ഖത്തറിൽ വിസിറ്റിങ്, ഓണ്‍അറൈവല്‍ വിസക്കാര്‍ക്ക് ക്വാറൻീൻ?വെള്ളിയാഴ്ച ഓൺ അറൈവൽ ബുക്കിങ്ങിന് ശ്രമിച്ചവർക്ക് 10 ദിവസ ക്വാറൻറീൻ ബുക്കിങ്ങിന് നിർദേശം ലഭിച്ചു
ദോഹ: പുതിയ യാത്രാ നയം പ്രാബല്യത്തിൽ വന്ന് 10 ദിവസം പിന്നിട്ടതിനു പിന്നാലെ യാത്രക്കാർ ഏറിയതോടെ പുതിയ ഭേദഗതികളും അധികൃതർ നടപ്പാക്കുന്നു. ഓൺ അറൈവൽ വിസയിലെത്തുന്നവർ 5000 റിയാലോ, തത്തുല്ല്യമായ തുക അക്കൗണ്ടിലോ സൂക്ഷിച്ചില്ലെന്നതിൻെറ പേരിൽ വ്യാഴാഴ്ച 17 മലയാളികളെ നാട്ടിലേക്ക് മടക്കിയതിനു പിന്നാലെ പുതിയ പരിഷ്കാരവും നടപ്പിൽ വരുന്നതായി സൂചന.
ഖത്തറിലെത്തുന്ന വിസിറ്റിങ്, ഓണ്‍അറൈവല്‍ വിസക്കാര്‍ക്ക് ഹോട്ടല്‍ ക്വാറന്‍റൈന്‍ നിര്‍ബന്ധമാക്കുന്നതായാണ് റിപ്പോർട്ട്. പുതുതായി ഓണ്‍അറൈവല്‍ യാത്രക്ക് അപേക്ഷിച്ചവര്‍ക്ക് ഡിസ്കവര്‍ ഖത്തര്‍ വഴി 10 ദിവസത്തെ ഹോട്ടല്‍ ക്വാറന്‍റൈന്‍ വേണമെന്ന് മറുപടി ലഭിച്ചു. ഇന്ത്യയുള്‍പ്പെടെ റെഡ് ലിസ്റ്റ് രാജ്യങ്ങളില്‍ നിന്നും സന്ദര്‍ശക വിസകളിലും ഓണ്‍ അറൈവല്‍ വഴിയും ഖത്തറിലേക്കെത്തുന്നവർക്കാണ് ഇത്തരത്തില അറിയിപ്പ് ലഭിക്കുന്നത്. ഇതോടെ രണ്ട് വിഭാഗങ്ങളിലായെത്തുന്ന സന്ദർശകർക്ക് പത്ത് ദിവസ ഹോട്ടല്‍ ക്വാറന്‍റൈന്‍ നിര്‍ബന്ധമാവും.
ഖത്തർ അംഗീകൃത കോവിഡ് വാക്സിൻ രണ്ട് ഡോസും എടുത്ത്, 14 ദിവസം പിന്നിട്ട യാത്രക്കാർക്ക് ക്വാറൻറീൻ ആവശ്യമില്ല എന്നാണ് നിലവിലെ ചട്ടം. ഇവർ വിമാനത്താവളത്തിലെത്തി എമിഗ്രേഷൻ നടപടികൾ പൂർത്തിയാക്കിയാൽ ആർ.ടി.പി.സി.ആർ പരിശോധനക്ക് വിധേയരായി പുറത്തിറങ്ങുന്നതായിരുന്നു പതിവ്. എന്നാല്‍ വെള്ളിയാഴ്ച പുതുതായി ഓണ്‍അറൈവല്‍ യാത്രക്ക് അപേക്ഷിച്ചവര്‍ക്ക് ഡിസ്കവര്‍ ഖത്തര്‍ വഴി 10 ദിവസത്തെ ഹോട്ടല്‍ ക്വാറന്‍റൈന്‍ വേണമെന്ന് മറുപടി ലഭിച്ചതായാണ് വിവരം. എന്നാല്‍ ഇക്കാര്യത്തില്‍ ഔദ്യോഗിക വ്യക്തത ലഭിച്ചിട്ടില്ല.
സൗദി, യു.എ.ഇ, ഒമാൻ തുടങ്ങി ഇന്ത്യയിൽ നിന്നും നേരിട്ട് യാത്രാ വിലക്കുള്ള രാജ്യങ്ങളിലേക്ക് മടങ്ങാൻ ആഗ്രഹിക്കുന്ന നിരവധി പ്രവാസികളാണ് കഴിഞ്ഞ ഒരാഴ്ചക്കിടെ ഖത്തറിലെത്തിയത്. ഓൺ അറൈവൽ വിസയിൽ ഇവിടെ എത്തി 14 ദിവസം പൂർത്തിയാക്കിയാൽ, ലക്ഷ്യ സ്ഥാനത്തേക്ക് മടങ്ങാമെന്നാണ് ഇവരുടെ പ്രതീക്ഷ. ആദ്യ സംഘങ്ങൾ ഒരാഴ്ച പിന്നിടവെ, കഴിഞ്ഞ ദിവസങ്ങളിൽ വലിയ തോതിലാണ് കേരളത്തിൽ നിന്നും സൗദി-യു.എ.ഇ എന്നിവിടങ്ങളിലേക്കുള്ള യാത്രക്കാർ എത്തിയത്.
ഇവരുടെ പ്രതീക്ഷകൾക്ക് തിരിച്ചടിയേകുന്നതാണ് പുതിയ മാറ്റം. 10 ദിവസം ഹോട്ടൽ ക്വാറൻറീൻ അനിവാര്യമായാൽ ഖത്തർ വഴി കുറഞ്ഞ ചിലവിൽ സൗദി-യു.എ.ഇ എന്നിവടങ്ങളിൽ എത്താമെന്ന സ്വപ്നങ്ങൾക്ക് തിരിച്ചടിയാവും. നിലവിൽ ഓൺ അറൈവൽ യാത്രക്കാർക്ക് ഹോട്ടൽ ബുക്കിങ് ആവശ്യമാണെങ്കിലും, പലരും ഡമ്മി ബുക്കിങ് മാത്രമാണ് നടത്തുന്നത്.
Comments
Post a Comment